एक गुँड़री चरइ एक पोखरा-पिंडे अंडा पारलक। चाइरो अंडा गुढ़रते-गुढ़रते फूइट गेलै, आउर उमन से चाइर किसिम कर जीउ पएदा भेलें। पहिल अंडा ले एकठो बरद निकललक, दोसर ले एक अदमी जनमलक, तीसर ले एक नेवरा पएदा होलक आउर चौथा ले जे निकललक से गुंड़री चरइ कर छब धरलक। चाइरो जीव कहर्ले, “लगे आब आपन-आपन डहर घरब।” गुँड़री तो दोसर चरइ मन में जाए मेसालक। मगर तीनों दोसर भाइ संगे-संगे चलेक लागलें। जाते-जोते उमन एक झन राजा कर नगर में पोहँचलैं आउर एकठो पोखरा-पिंडे ठहरलें। अदमी गोट कहलक, “भाइमन, एहे जग डेरा करब।” ई बात सउब के मंजूर भेलक आउर उमन उहाँए रहेक लागलें।

ऊ पोखरा राजा कर रहे आउर बेटीहारमन उकर में नहाएक-धोएक आवत रहें। एक दिन इसन भेलक कि जे बेरा ऊ अदमी नहात रहे, सेहे खन रानियो-बेटीमन नहाएक आर्ले, आउर देखतहैं तो ऊ अदमी डुबकी मारलक आउर ढेइर देरी में गाए निकललक। रानी बेटीमन के बड़ा अचरज लागलक, काहे कि ओहो मन बेस नाक-डुबकी लगाएक पारत रहैं। से उमन कहलें, “लगे हमरे पानी में डुइब-डुइब के खोजा-खोजी होब। अगर रउरे हमरे के खोइज निकलाब होल हमरे सात बहिन-मधे केउ रउर से बिहा करी, आउर हमरे रउरे के खोइज निकलाब होल रउरे के हमर बापक गुलाम होएक होइ।” अदमी माइन गेलक आउर किरिया खालक, कि “बात के काइल पूरा करब।” इकर पाछे सउब नहाए-धोए के अपन-अपन घर गेलैं।

अदमी तो खाएक-सुखे किरिया खाए रहे। आब उके चिन्ता होएक लागलक। से ऊ सोच-सागर में डुइब के आउर खटिया-पटिया लगाए के सुइत रहलक। बरद, उकर दादा, ई बात के देइख के पूछलक, “का रे बाबु, ई का रंग-ढंग? का भेलक?” अदमी कहलक, “दादा, मोएँ का कहों? मोर तइनको सकबक नि चलतहे। मोएँ तो बड़ा फंदा में बाइझ जाएहों। देख, पारवे होल तोहें मोके उगाओ चाहे डुबाओ।” बरद कइह घुरालक, “मइया, कहबे, तब तो मोएँ जानबुँ और कोनो करखें। बेगर जानले मोएँ का करो?” तब भाइहार सुनाएक लागलक “पोखरा में नहाएक खन रानी-बेटीमन से ई

बात कर किरिया खावा-खावी होए ही, कि अगर नाक-डुबकी लगाएक खन उमनके खोइज निकलाबु होल उमन मधे केउ मोर से बिहा करी, आउर अगर उमन मोके पाए जाबें होले मोके उमनक बापकर गुलाम होएक परी। से कइसे का करों? ई बात कर मोर मन में बड़ा अन्देसा आहे।” बरद कहलक, “ई तनी इसन बात लागिन एतना अन्देसा? उठ, भात खा, मोएँ ई बात कर चिन्ता करतहों।” अदमी उठलक आउर भांत खालक, सेखन बरद भाइ-हार कहलक, “काइल जेखन रानी-बेटीमन नहाएक आबैं सेखन मोहों जाहुँ। जेखन तोर डुबकी लगाएक पारी होइ, सेखन मोएँ तोके गेतु मछरी बनाए के आउर पानी सएँ पीके अपन नाके राखबुँ। से रानी-बेटीमन डुबकी लगायें तो तोके नि पार्दै। जब उमनक डुबकी लगाएक पारी होइ, सेखन मोएँ पोखरा कर पानी के पी अटुबाबु, आउर तोएँ रानी-बेटी मनके सहजे खोजेक पारबे। से बाबु, तोएँ चिन्ता ना कर।”

तीसर दिन रानी-बेटी मन नहाएक आर्ले, तो ओही अदमी पानी में हेललक। उकर पाछे पानी पीएक बहना दुकलक। जइसने रानी-बेटी मन कहलें कि, “लगे रउरे पहिले डुबकी लगाउ, आउर हमरे रउरे के खोजब,” तइसने अदमी ठो डुबकी मारलक आउर भाइहार उके गेतु मछरी बनाए के पानी सएँ पी देलक आउर नाक में राखलक। रानी-बेटी मन मर उके खोजें, पोखरा कर ई बट ले ऊ बट डुबकी लगाएँ, मगर उके पाबे नि करें। अन्त में हाइर गेलें आउर कहलैं, “लगे आब पानी ले निकसु। आब हमर पारी डुबकी लगाएक आउर रउर पारी खोजेक।” बरद पानी में मुँह करलक, आउर गेतु मछरी चट अदमी होए घुरलक आउर पानी से निकसलक।

तब रानी-बेटी मन कहलें, “लए, हमरे तो रउरे के नि खोजेक पारली। देखी आब रउरे हमरे के खोजेक पारब कि।” तलेक उमन डुबकी मारलैं। बरद तुरते पानी पियेक हेललक आउर आधा पोखरा में अँठ्याए देलक। रानी-बेटी मन के अदमी ठो तुरते खोइज निकलालक। से उमन हाइर गेलैं आउर महल घुइर के पलंग में सुइत रहलें।

राजा उमन के ढेइर समय ले नि देइख के पूछलक, “बाबी-मनके का भेलक जे आइज नि दिसतहैं?” भीतरियाइन आए के बतालक, कि “सरकार, सातो बाबीमन अन-पानी तइज के सुतल आहैं। उमनक चेहरा-मोहरा मुरझाए जाए है। केजन बेमार पइरहें कि रूसतहैं।” राजा रानी-बासा कुइद गेलक तो देखतहे कि सातो राजकुँवारीसुतल आहैं। उके फिकिर होलक आउर पुछारी लेक लागलक, कि “पेयारी बेटीमन ! का भेलक? के का कहलक, कि करलक, से बतावा तो हम उके सजइ देब। अगर कोनो कर घटी आहे, तो उकहों कहा आउर हम पूरा करब।” रानी-बेटीमन कहलें, “बाबा, केउ कोनो नि कइहहे, न कइरहे, न हमरे के कोनो बात का घटी आहे। मगर हमरे एक भूल करली, नाक-डुबकी में हारा-जीता खेलली आउर हाइर गेली।” तलेक सउब बात के खोइल के उमन राजा के सुनाए देलें आउर कहलें, कि “हमरे किरिया खाए के बात देही। से ई बात के पुरा होएके चाही।” राजा कहलक, “पेयारी बेटीमन! इकर चिन्ता ना करा। हम ई बात के देइख लेब। तोहरे उठा आउर अन-पानी गरहन करा।” मझली बेटी कहलक, “निहीं बाबा, जब तक हमर किरिया के पुरा करेक छुटी नि देब, तब तक हमरे अन-पानी नि छुवब।” इके सुइन के राजा मने मन खिसालक आउर कहलक, “अच्छा, हम तोकहें उकर से बिहा कइर देतही।” ई सुइन के रानी-बेटीमन उठलैं आउर खालैं-पीलें। थोरेक दिन पाछे राजा मझली बेटी-हार के ऊ अदमी सएँ बिहा कइर देलक।

बिहा कर पाछे राजा पसताएक लागलक, कि “ओहरे हमर आउर हमर बेटी कर बगड़ल किसमइत! फूटल कपार ! इसन सुन्दर, चाँद नियर बेटी कर बिहा एक लंगटा-बुचा, भकुवा-गँवार से होए गेलक। कोन उपाय जे करू कि बेटी के उकर से छोड़ाएक पारू।” तलेक मंतरी के बोलाए के आउर सउब अपन मनक बात सुनाए के पूछलक, कि “मंतरी साहेब, बताउ कि हम बेटी के ऊ मुरूख-गँवार दमाद कर हाँथ से कइसे छोड़ाउ?” मन्तरी कहलक “सरकार, हमके काइल तक कर समय दियाल जाओक तो हम कोइ उपाय सोइच के बताब।”

दोसर दिन मन्तरी राजा ठिन पोहँचलक आउर कहलक, “गरीबपरवर, हमके मालुम होलक कि ऊ गँवार कर एक बरद भाइ आहे। ओहे उके सउब बुझ्ध बताए देला। से पहिले उकहें अलग करेक होइ। तब सउब दोसर बात बनी।” राजा पूछलक “तो उके कइसे अलग करब?” मन्तरी कहलक, “रउर नवकुँजर हाथी से उके भिड़ाए देउ। हाथी उके चीर फाइर के ढेइर लगाए देइ।” राजा अपन नउवा ओहदार के दमावहार के बोलाएक भेजलक। दमाद आलक तो राजा उके कहलक, “काइल दरबार में तमासा होइ। से रउर भाइ के हमर हाँथी सएँ लइड़ के तमासा देखाएक परी।” ई बात सुइन के

दमाद ठो कर जीउ नेहाइत छोट भेलक, काहे कि समइझ गेलक कि ई बात कर का मतलब हेके। से ऊ घर घुइर के आउर अन-पानी तेयाइग के बिछना-हारे सुइत रहलक। उकर दसा देइख के बरद पूछलक “का बात भेलक बाबु ? कोनो सीत-जुड़ा तो नि लागलक? मन-कान के का लाइ गिराए देहिस?” अदमी कहलक, “का कहों, दादा! कहल नि जाए! बड़ा मसकिल पइरहे! राजा तोर सएँ अपन नवकुँजर हाँथी के लडुवाएक खोजतहैं।” बरद हँसलक आउर कहलक, “इकरे लागिन एतइ सोच ! उठ तोएँ जीउ के कोनो अन्देसा न कर! हाँथी से मोके लड़ेक होइ तो कोन बड़ बात! सार के ढुइस-ढाइस के छेछरा ना करों तो मोके आउर दादा न कहबे।”

दोसर दिन तमासा देखड्या मन से दरबार खचाखच भरल रहे। उकर आगे बड़का अंगना में बरद और हाँथी के लानलैं आउर सामना-सामनी खड़ा कइर देलें।

हुकुम होते साथ दुइयो भीर परलैं। हाँथी तो अपन गतर कर बोझ से का कुइद-फांइद के लड़ी? खाली हिने-हुने ढपढपाए फिरतहे। मगर बरद दाँव देइख-देइख आउर घत लगाए-लगाए के इसन कुइद-फांइद के हाँथी के दुसे कि ऊ अकबाकाए गेलक। से बरद उके ढुइस-ढुइसके छेछरा कइर देलक। अन्त में हाँथी-राम थाइक के लेटलेटा आउर घाव से लहूलहान होए गेलक, तलेक ढनमनाए के गिरलक आउर ढेइर होए गेलक। राजा मन्तरी ऊपर रंजालक, सिंहासन से कुइद उतरलक, मन्तरी के पटइक के आउर उकर नरटी के धइर के चाइर जूता कइस के मारलक आउर कहलक, “मन्तरी सार हमर हाँथियों के मरूवालक आउर हमकेहों बेइजइत करूवालक।” मन्तरी बेचारा “दोहाइ सरकार, दोहाइ सरकार” कइह के माफी मांगलक।

पाछे देवान राजा के कहलक, “गरीब-नेवाज, अबरिक हाम एक उपाय करतही जे जरूर सफल होइ। एक बाघधनी कहाँओं रोपुवाउ, उकर कल-छटकेक डोरा के कोनो केरा गछे खुटवाउ आउर बरद के बोलाए के उके दुसवाउ। केरा के ढुसते हैं कल छटकी, तीर उड़ी आउर बरद के लागी, जेकर से ऊ मोइर जाइ।”

दमाद कर फेइर बोलाव होलक आउर उके कहल गेलक कि “रउर दादा बरद के एक कामे भेइज देउ।” अदमी सगइझ गेलक कि भाइ कर परान लेक लाइ कोनो बात होइ। से ऊ घर घुइर के दादाहार के बात सुनाए देलक। बरद सुइन के कहलक, “बाबू, तोयँ मोर चिन्ता न कर। जे होएक आहे ऊ होवे करी। से उके डराले, गुनले कोनो लाभनिहीं। अगर मोके मोरके आहे आउर मोरिए जाहुँ, तो मोके लानबे आउर कोनो ठन गाइड़ देबे। पाछे कोनों दिन अगर तोके लड़ेक-भिड़ेक होइ होल मोर कबुर के खोइल देबे। उकर ले भँवरामन निकलबएँ आउर तोर दुसमन मनके हरूवाए देबएँ।” एतना कइह के बरद राजा कर बखरी गेलक। राजा कहलक, “ऊ केरा से हमर एक काम आहे, से जाए के उके दुस।” बरद गेलक आउर दुसलक तो बाघधनी कर तीर सोझे उकर छाती में लागलक आउर ऊ मोइर गेलक। पाछे भाइहार आलक, काँदा-रोवा करलक आउर उके ले जाए के तोइप देलक ।

राजा आउर देवान बड़ा खुस भेलें आउर राजा कहलक, “एक बात तो बइन गेलक। आब उके नास करेक चाही, काहे कि जब तक ऊ जीते रही तब तक बेटी हमर उके कभी नी छोड़ी।” मन्तरी कहलक, “राकस-बन में एक अम्बा-गछ आहे, जे बारहों महीना फरेला आउर पाकेला। एक जोड़ा राकस-राकसिन उकर रखवारी करेना। से रउरे आपन दमाद के ऊ अम्बा कर फर लानेक भेजू तो राकस-राकसिन उके धइर खाबैं।” राजा दमादहार के बोलालक आउर ओहे तइर हुकुम देलक कि “राकस-बन जाए के अम्बा तोइर लानु।”

ई बात के सुइन के दमादहार कर जीउ उइड़ गेलक। घर घुरलक आउर बइठ के चुपचाप सोच में डुबलक। रानी-बेटी उकर दसा देइख के पूछलक, कि “रउरे के आइज का भेलक, जे मोरल मुरदा लखे दिसतही? मोके कहिए सुनाउ, नि होल मोकहों अनइत दुख होइ।” दुलहाहार जबाब देलक, कि “रानी-बेटी, देखु तो रउर बाप कर चाइल। मोर दादा के मोरालें, आब मोकहों मोराएक खोजतहैं। ऊ मोके राकस-बन अम्बा तोइर लानेक भेजतहैं। रउरे मोके पेयार करली आउर मोर सएँ बिहा भेली, ओहे चाड़े इसन करतहैं। से रउरे नइहर घुइर जाउ आउर मोएँ कहाँओ जाए मोरबुँ।” रानी-बेटी कहलक, “इसन बात आहे! अच्छा तो मोहों बाबा कर चाइल के देखबुँ। गरीब तो गरीबे, रउरे मोर पुरूख हेकी ! रउर सेवा करेक मोर काम हेके। से मोएँ रउरे के कभी नी छोड़बुँ। बाबा जे अरहाए हैं सेके ना डराउ। राकस-बन कर राकस-राकसिन मोके जानेना आउर महीना-महीना अम्बा भेइज देना। से रउरे मोर ई अंगठी के ले के जाउ। उमन के अंगठी देखाए देब होल उमन रउरे के कोनो नि करबें, उलटी रउर हुकुम मानेक लाइ तेयार होवें।”अदमी अंगठी लेके चललक। बन पोहँडच के देखतहे तो अम्बा गप्ठे सुन्दर-सुन्दर फर पाइक रहल आहे। मगर गछ कर फेडे में दइयो राकस-राकसिन ओठइंग के निन्दात हैं। तेउ अदमी डीढ़ कइर के गछ में चढ़लक आउर अम्बा तोइर-तोडर के खाएक लागलक। चोपा आउर आठुमन के तो ओहे ठिन बिग देलक। राकस-राकसिन कर नींद चटकलक, उमन आह ! उह ! कइरके उठलें तो राकसिन कहलक, “का जे मनवा-मनवा बसातहे!” उपरे ताकबो करलें कि अदमी रानी-बेटी कर अंगठी के गिराए देलक आउर कहलक, “मोएँ फलनी रानी-बेटी कर अदमी हेकों।” राकस-राकसिन अंगठी के बिछ के देखलें, चिन्हलैं आउर अदमी के कहैं, “उतरू बाबू! कने-कने ! लगे गोड़ लागतही!” अदमी कहलक, “राजा साहेब, याने मोर ससुर अम्बा मांगक भेइज हैं। से लाइ जुन आएहों।” राकस-राकसिन कहलैं, “बेस! कइसन लेजब? हमरेहें पोहँचाए देब।” तलेक उमन बेस पाकल-पाकल अम्बामन के तोरलैं। राकसिन उमन के एकठो बड़का छटका में बोहलक। राकस अदमी के खाँध-उपर बइसालक आउर तीनों झन राजा-महल बट सोझालें।

राजा तो उमन के देइख के घबराए गेलक आउर दमादहार के कहलक, “हम तो रउरे के थोरे इसन अम्बा मांइग रही! रउरे एक छटकाए भरूवाए लानली! बेस, आब ई दुइयो झन के भेइज देउ।” दमादहार कहलक, “एतइ दूर थाकल आए के ई मन बेगर खाले कि जायें? से खाएक लागिन ई मनके दुइझन अदमी देउ।” राजा कहलक, “ई मन तुरी-टोली जाएँ आउर केकहो दुइ झन के धइर खाएँ।” राजा कर दमाद राकस-राकसिन के कहलक, “जावा, तुरी-टोली में केउ दुइ झन के कलवा कड़ के आपन चइल जाबा।”

राजा मन्तरी उपर गोसा होलक आउर सिपाही मनके उके धइर लानेक भेजलक। सिपाही मन उकर उपर जुताए-जूता बरसाएक आउर ठोकेक-पिटेक लागले। देवान कर अकिले ठंढा होए गेलक। फिन ऊ “दोहाइ! दोहाइ!” चिचियाए के माफी मांगलक आउर कहलक, “गरीबनेवाज, रउर दमाद के बाघिन कर दूध लानेक भेजु, तो ऊ नि पारी, बाघ-बाधिन उके खाए जावें।

राजा दमादहार के बोलाए के हुकुम फरियालक, कि “दवइ बनाएक लागिन बाधिन-दूध दरकार आहे। से बन जाउ आउर बाघिन-दूध खोइज लानु।” राजाक दमाद तो ई बात सुनिए के अंधुवाए गेलक आउर सोचलक कि “मर रे, अबकी कइसे बाचबुँ!” घर घुइर के रानी-बेटी के कहलक, “ससुर तो मोके मोराल बिगुर नि छोड़वें। रउरे मोके राकस-राकसिन से बचाली, आब रउर बाप मोके बाघिन दूध लानेक पइठात हैं।” बाबी साहेब कहलक, “सुनु मोएँ इकर उपाय करत हों। ई मोर झाड़न के देखु। इके ले जाउ आउर जहाँ बाघ-बाधिन से रउर भेंट होइ उहाँ उमनक आगे इके फेइक देब। बाघ-बाधिन समइझ जायें कि रउरे मोर अदमी हेकी आउर रउरे के कोनो नि करबैं।”

राजाक दमाद बाधिन दूध लानेक चललक। जाते-जाते ऊ अखंड बन में पोहँइच गेलक तो देखतहे का कि दुइगो बाघ छउवा खेइल रहल आहैं। ऊ उमन ठिन नइजकालक आउर उमन के झारेक-पोछेक हेललक। ओहे खन कने से बाघ-बाधिन गरजते आए गेलें आउर उकर उपर झपटेक ताक-तुक करत रहैं कि ऊ उमनक आगे झाड़न के फेंइक देलक। झाड़न देइख के बाघ-बाधिन भकुवाए गेलैं आउर पूछलें, “काहे राजाक दमाद-बाबू। कने-कने? बेसे-बेसे तो?” अदमी कहलक, “एहे बट रउरे मन ठिन एक जरूरी कामे आएहों। राजा साहेब जुन बाधिन दूध मांगत हैं।” “अच्छा, ऊ मिल जाइ। मगर आइज कर गोतिया रइह लेउ।” ई कइह के बाघ-बाघिन उकर खाएक बन्दोबस्त करेक गेलैं आउर गाँव-बट ले जेकर-तेकर तियन, मिठइ-रोटीमन लुइट लानलें। अदमी पेट भइर खालक आउर बने में सुइत रहलक।

होत बिहाने बाघ-बाधिन सउब छउवारी बाघिन मन के बोलाए जमा करलैं आउर दूध मांगलें तो दुइ गगरी नियर दूध होए गेलक। राजाक दमाद कहलक, “ढेइर भेलक, आब मोके एकझन भरिया खोइज देवा।” बाघ-बाघिन कहलें, “हमरेहें पोहँचाए राखब। से लगे हमरे उपर गगरी मन के तेंगइर देउ आउर रउरहों हमर पीठ उपरे चइढ़ के बइठु।”

अदमी ओहे तइर करलक आउर बाघ-बाघिन के संगे लाइन के राजा कर दुरा में आए ठाढ़ भेलक। राजा उमनक आवेक सुइन के डरे-मोरे महल-भीतरेहें ले कहलक कि “दूध के ओहे जगन मँड़ाएक कहु आउर उमनके बिदा कइर देउ।” दमादहार कहलक, “होइ, उसने जुन उमन भूखे-पियासे बन घुरबैं! उमनके खाएक मिलेक चाही कि।” राजा कहलक, “ऊ मनके तुरी-टोली बट भेइज देउ।” बाघ-बाघिन तुरी-टोली गेलैं आउर जेके पार्ले तेकहें धइर खालें आउर बन घुइर गेलैं।

इकर पाछे राजा फिन सिपाही भेइज के देवान के धइर मंगालक आउरकहलक, “का बउ, कतइ धाँव हमके ई तइर ठकते जाब? हमर सिपाहीमन, देवान के लाइथ-मुटका से ठाँव जाइन-जाइन के मारा।” सिपाहीमन हुकुम पाते साथ देवान के माइर-माइर दरमोरा कइर देलें। राजा पाछे सोगालक आउर उमनके मना करलक। देवान मसकिल से उठलक आउर कहलक “हजूर, आउर एक उपाय कहीं? रउर दमाद सार के भालू-दूध लानेक भेजू। भालू उके नोइच, हबइक आउर चाइब के गुंड़ा कहर देवें।”

दोसर दिन राजा दमादहार के बोलाए के फरमालक, कि “दमाद बाबू, तनिक भालू-दूध जुन दरकार आहे; से कहाँओ ले खोइज लानु।” दमादहार घर गेलक आउर जीउ कर अन्देसा से केकरो से बिना चाल-बोल ढलइंग देलक। रानी-बेटी आलक आउर पूछेक लागलक, “अबकी बाबा रउरे के कोन काल-मुँहे डाइलहे जे रउरे एतना उदास होत ही?” दुलहाहार कहलक, “मोएँ आपन बिपइत का कहों? रउर बाबा में कोनो दया-माया तइनको नकहे। मोके एतना सताते आलें तेउ नि अनसालें।” रानी-बेटी कहलक, “रउरे मरद लखे सउब सहते जाउ। बिधि जे लिख देहे सेहे होइ, केउ कतनो कोनो करोक। बताउ तो बाबा का कइह आहैं? अगर बनी तो मोएँ उपाय करखूँ।” पुरूखहार कहलक, “अबरिक बाबा रउर भालू-दूध माँगत हैं।” रानी-बेटी कहलक, “एतने बात लाइ रउरे इसन अकुलाए फिरतही! लेउ मोर र्धेचा कर सोनाक सिकरी, बन ले जाउ। भालु से भेट होइ सेखन उकर आगे इके डाइर देब तो ऊ रउरे के मदइत करी।”

राजा कर दमाद ऊ सिकरी के लेके बन-भीतर पोहँचलक, तो एकठो भालू उके देइख पालक आउर “हफा-हफा, हफा-हफा’, करते आउर डिडियाते आलक। रानी-बेटी कर पुरूख चट सिकरी के उकर आगे फेइक देलक। भालू सिकरी के देखते-देखते चिन्हलक कि ई तो फलनी रानी-बेटी कर भेजल कोनो अदमी होइ आउर पूछलक, “कहु बाबु साहेब, कने आली? मोर से कोनो काम होइ, तो बताउ।” अदमी कइह घुरालक, “कटिक भालू-दूध जुन मांगेक आएहों। राजा साहेब के उकर कोनो काम आहे। से ओहे भेइज हैं।” भालु कहलक, “बेस रउरे इहाँए बइस के सुसताउ! मोएँ दुध जमा करूवातहों।” तलेक भालू जोर से हाँक देलक तो भालूमन जमा होए गेलैं। पहिल भालू सउब हाल सुनालक आउर दूध देक लाइ कहलक। तुरते मादा भालूमन दुइ गगरीदूध दुइह ठुरालें आउर अदमी के जिमा देलें। अदमी कहलक, “दूध तो देला, आब भरियाओ खोइज देबा।” दुइ ठो भालूमन कहलैं, “हमरे पोहुँचाए राखब। से रउरे गगरी मनके हमर पीठे लाइद देउ आउर रउरहों सवार होउ।”

महल कर दुरा ठिन भालूमन-ठाढ़ भेलें। राजा उमन के देइख के डराए गेलक आउर मने-मन सोचलक, “बाप रे कइसन अदमी! इके भालू-दूध लानेक पइठाओं तो ई भालूओमन के लेते लानलक।” तलेक दमादहार के कहलक, “दूध के ओहे ठन रखुवाउ आउस् भालूमन के घुराए देउ।” दमाद उकर कहलक, “होइ, एतना दूर आए के भूखे-पियासे कि घुरबएँ? उमन के कोनो खाएक देउ।” राजा कहलक, “उमन के तुरी-टोली भेइज देउ। उहाँ जे मन करी से खाए-पी के आपन चइल जाबएँ।” अदमी भालूमन के तुरी-टोली कर डहर बताए देलक। भालूमन उहाँ जे पालाएँ आपन खाए-पीके बन घुइर गेलें।

राजा देवान के बोलाय भेजलक आउर कहलक, “देवान, ई का बात? कए धाँव मोके ई तइर ठकते जाब? से निहीं, मोएँ रउरे के बनाए-बनाए के पिटवातहों। तब गाए चेत चढ़ी।” तलेक सिपाहीमन के उके पिटेक हेलाए देलक। सिपाहीमन देवान के पीट-ढेढ़ाए के सुताए देलें। होस घुरलक सेखन मन्तरी कहलक, “पिरथीनाथ, माफ करू। अबरिक जे उपाय करतहों से जरूरे सही होइ। दमाद आपन के रउरे मनुस-हुँदु लानेक कहु।” राजा दमाद आपन के बोलाए के मनुस-दुंदु लानेक फरमालक।

राजाद दमाद रानी-बेटी के सउब बात बताए देलक, तो रानी-बेटी कहलक, “निफिकिर रहु, मोएँ उपाय करतहों। रउरे राजा-ठिन जाए के एक हफ्ता समय मांगु आउर बन में जाए के सउब राकस, बाघ आउर भालूमन के एक हपता कर पाछे आवेक फरमाए आउ।” हिने रानी-बेटी नेवरा-देवर आपन के कहलक, “जाउ बाबु, चरइ धइर-धइर के एक छटका पुदगा जमा करू।” रानी-बेटी अपने जाए के तीन-चाइर गगरा गुर किन लानलक। आब हफ्ता पुरेक लाइ एक दिन बाकी रहे, सेखन राजा साहेब आपन नउवा ओहदार के बोलाए के कहलक, “जा तो ना, देइख आबे, हमर दमाद सार जीते आहे कि मरलक। एखन तक ले मुँह नि देखातहे।” नउवा गेलक तो खाली रानी-बेटी के पालक आउर पूछलक, “महल में बाबु साहेब कर खोजार होतहे। घरे आहैं नि नकहें?” रानी-बेटी कहलक, “ठाकुर साहेब, ऊ तो कने नि कने ओहे दिनचइल गेलें। एखन ले नि घुइर हैं। हम के उनकर पताओ मालुम नकहे। के जन जीते आहें कि मरलें। हमके बड़ पसतावा आहे कि हम उनकर ठिन बिहा भेली।” नउवा कहलक, “अभागा रउरे कर जिनगी के बरबाद कइर राखलक। आब पसताले का होइ? छोट अदमीमन से बिहा करले उसने होएल। धोखा होइए गेलक। आब राजाओ रउरे के समइत करवैं कि निहीं। मगर अधिक चिन्ता न करु। हम तो आहबे करी। हमर से सादी कइर लेउ आउर सउब बात बइन जाइ।” रानी-बेटी कइह घुरालक, “होइ तब, ओहे बात होक। रउरे राजा के मोर अदमी कर हाल बताए के घुइर आवब, तो बेस तहर दुइयो झन बात-चीत करब कि का करले बेस होइ।”

नउवा खुसी-खुसी राजा-ठिन कुदलक आउर सउब बात सुनाए देलक कि “बाबु साहेब कर तो कोनो पताए निहीं। घर से निकसलें जे आइज तक नि घुइर हैं, न जानी जीते आहैं कि कहाँओ जाए मोरलैं।”

नउवासाँझ बेरा बाबी कर महल गेलक। रानी-बेटी आपन पुरूख के पहिलेहें बताए दे रहे कि का करेक चाही। से जेखन नउवा रानी-बेटी सएँ बतियात रहे सेहेखन राजाक दमाद कने ले खोखते आवेक लागलक। रानी-बेटी नउवा के कहलक, “जल्दी जल्दी ई छटका में लुइक जाउ, नि तो ऊ एखन हमर का दसा होइ।” नउवा छटका में ढुकबो करलक कि रानी-बेटी कर पुरूख पोहँचलक। रानी-बेटी पानी में गोरल गुर कर गगरामन के छटका में उझइल-उझइल देलक आउर पुरूखहार के कहलक कि “आउ छटका कर पाइँखमन के उलट-पलट करब।” दुइयो बेकइत खउब उलट-पलट कइर के नउवा कर गतरे पुदगामन के लटकाए देलें सेकर पाछे उके छटका से निकलाए के भुँईए पटकलें आउर मुँहहार के सी देलें। आब रानी-बेटी कर दुलहा नउवा के डंडा में डोरा से कइस के बांधलक, महल कर डेयोढ़ी में लेजलक आउर राजा ठिन हाल भेजलक कि “रउर दमाद मनुस-दुन्दु लाइनहे से देखेक निकलु।” राजा आउर महल कर जतना नोकर-चाकर दीया ले-लेके निकललैं, तो मनुस-दुन्दु डेयोढ़ी में ठढ़ाएहे। राजा कहलक, “तनिक दुन्दु के बोलवाउ तो कइसन बोलेला?” राजाक दमाद नउवा के वुइ सोटा मारलक तो नउवा “उम-उम! उम-उम!” गगालक। राजा सोचलक कि सते मनुस-दुन्दु हेके। पाछे दमाद ठो नउवा के छोइड़ देलक आउर घर जाएक कहलक।

नउवा घर गेलक आउर दुरा में “उम-उम” करेक लागलक। जनाना उकर निकलक तो उके देइख के डराय गेलक आउर चिचियाएक लागलक। नउवा उकरपाछे-पाछे घर ढुकलक तो जनानाहार एक लुआइठ लेलक आउर उके झोलेक-खोरेक लागलक। खोरते-खोरते नउवा कर सियल मुँह खुइल गेलक आउर ऊ नउवाइन के गरियाएक लागलक, “बाघधरिन नि देखतहिस कि मोएँ हेकों।” नउवाइन पुरूखहार के चिन्हलक आउर बड़ा सोगाएक लागलक। “कोन पगरीढाहा मोर पुरूख कर इसन दसा करलक।” कइह के कान्देक लागलक आउर उके नहुवाए-धोउवाए के सफा करलक।

बिहान के राजा देवान के फिन धइर मंगुवालक आउर खउब पिटुवालक, सेकर पाछे पूछलक कि “आब का उपाय करेक होइ?” देवान कहलक, “महराज, आब लड़इ बिगुर नि बनी।” राजा दमादहार के कहलक, “आब रउरे सएँ हमर लड़इ होइ तबे बनी। से तेयार होए जाउ।” ऊ घर गेलक आउर कनया आपन के बतालक कि “ससुर तो आब मोर से लड़ाइ करेक ठाइन हैं।” रानी-बेटी कहलक, “बेस, देखल जाइ।” दोसर दिन लड़इ होएक लागलक। राजाक दमाद राकस, बाघ, भालूमन के पहिलेहें हाल दे दे रहे। लड़इ-मैदान में उमन दुइयो बेकइत गेलें। रानी-बेटी अंगठीहार के अंगुर ले निकाललक आउर कहलक, “अगर मोएँ राजा कर असल बेटी आउर आपन पुरूख कर सती इसतिरी हेकों, तो ई अंगठी हमरे के बचाइ।” इसन कइह के अंगठी के सामने राइख देलक। दमादहार राजा के कहलक, “लगे रउर सिपाहीमन के तीर-तलवाइर चलाएक कहु।” राजा कर हुकुम पाते साथ सिपाहीमन राजाक दमाद के बिधेक-मारेक लागलें। मगर न तो तीर छुटे न तलवाइर काटे। सउब सिपाही तीर-तलवाइर चलाए-चलाए के थाइक गेलें। तब राजाक दमाद कहलक, “आब हमरे पारी।” तलेक जहाँ बरद भाइहार के तोइप रहे उके उटकाए देलक। हुँआले भँवरमन भनभनाए के निकललें आउर सउब केउ के बिंधक लागलें। उकर पाछे रानी-बेटी कर दुलहाहार राकस, बाघ आउर भालूमन के सिपाहीमन उपर हेलाए देलक। राजा आउर सिपाही मनके भागेक आफइत ! राजा दमादहार के गोहराएक आउर दोहाइ देक लागलक, “छमा करु, आउर लड़इ मनाही कइर देउ। हम रउरे बुझ्यो बेटी-दमाद के आधा राइज दे देतही। आब से रउरे मन के आउर नि सताब। कान धरतही।” राजाक दमाद अपने बट कर लड़ड्या मनके मनाही कइर देलक। तब राजा उके आधा राइज देलक आउर सउब केउ सुख से रहेक लागलें।

प्रस्तुति फा. पीटर शांति नवरंगी

इसे भी पढ़े

खोरठा लोक कथा धनेक धधेनी | khortha Lok katha Dhanek Dhadheni

खोरठा लोक कथा | टिपटिपियाक डर | Khortha lok katha tiptipya ke dar